இஞ்சை எல்லாமே வெளிச்சுப் போச்சு. ஒருத்தரையும் காணேல்லை. மனிசர் மட்டுமில்லை.இந்தக் கடலுக்கை துள்ளி விளையாடிய மீன் குஞ்சுகளையும் தான் சொல்லுறன்.முன்னையெல்லாம் பிடிச்ச மீன்களையெல்லம் தேவைக்குப் போக மீதியைக் காய வைத்து கருவாடாக்கி பாதுகாத்தம். ஆசுவாசமாக மீனைப் பிடிக்க கம்பிக் கூடடித்து வலைகளால் சுற்றி வளைச்சு களங்கண்டி என்ற பேரோடை கடலுக்கை இறக்கி மீனைப் பிடிச்சு இந்த எண் சாண் உடம்பை வளர்த்தம். இப்ப இங்கை முழுக்கடலுக்கும் கம்பி வேலி போட்டு தடுப்புக் காவல். இந்த விந்தை உலகத்திலை எந்த மூலையிலும் நடக்காத ஒன்று. இப்படி முனகுவவது சிமியோன் அப்பா தான்.

இன்னல்கள் மின்னல் வேகத்தில் போகலாம். ஆனால் எம்மவர்க்கு இன்னல்கள் தான் இலவச விருந்தாளி.இவர் வந்தால் போவதில்லை. இவரை அனுப்பிட பல முயற்சிகள் எடுத்தாலும் அவருக்கு எமது பராமரிப்பு மிகவும் பிடித்துக் கொண்டு விடுவதுபோலும் அதனால் அவர் எம்மை விட்டு அகல மறுத்து விடுகின்றார். இவர் எம்முடன் தத்துப் பிள்ளையானதும் குடும்பக் கட்டுப் பாடு செய்து கொள்வதில்லை.தன்னைத் தானே இனப் பெருக்கம் செய்து கொள்ளும் பண்புடையவரகின்றார். இவர் ஏற்படுத்தி விடும் வலிகளுக்கு நாம் வாழ்க்கைப் பட்டு விடுகின்றோம்..