"அகதிகளின் உள்ள குமுறல்"

சொந்தமாயிருந்த வீடு இழந்து 
சொத்தேயென்று இருந்த கல்வியிழந்து 
சொர்க்கமேயென்று இருந்த மண் இழந்து 
சொந்தமில்லா அன்னிய தேசத்தில் 
சொல்லொணா துயருடன் அகதியெனும் பட்டத்துடன் 

வாரிவாரி அணைத்த சொந்தங்களை பிரிந்து 
வாசமில்லா தேசம்வர பணத்தினை அள்ளியள்ளி கொடுத்து 
வானவில் பார்த்து இரசித்த வானத்தில் 
வானப்பறவை மூலம் பறந்து வானகத்து தேசம் வந்தோம் 

 "வறுமையின் சாடல்"


அன்பே உருவான இறைவனே 
அகிலமும் ஆளும் இறைவனே 
கல்லாலான இறைவனே 
கருணையே உன்னிடம் இல்லை(யா)
உருவமே இல்லா இறைவனே 
உருக்கமே உன்னிடம் இல்லை(யா)

மானிடர்யிடத்தில் ஏன் உன் பித்தலாட்டம் 
பொக்கிஷம் ஏன் கொடுத்தாய் பலரிடம் 
வறுமையை ஏன் கொடுத்தாய் எங்களிடம் 

   "சாதனை மலரே"
தமிழ் இனம் போற்ற பிறந்தவளே 
மயிலை மண்ணுக்கு பொன்னாடை போர்த்தியவளே 
உந்தன்  சாதனையில் பூரிக்கிது நம்மினம் 
பொக்கிஷம் போல் உன்னை காத்திட ஏங்குது நம்மினம் 

பாராட்டுமழைகள் குவியட்டும் உன்மடியில் 
சாதனை இமயங்கள் தொடரட்டும் உந்தன் அறிவில் 
விண்வெளியில் அக்கினி சுடரும் உன்காலடியில் தலைசாயட்டும் 

ஏர் பூட்டி 
வயல் உழுது 
வரம்பமைத்து 
வாய்க்காலில் நீர்பாய்ச்சி 
நாற்று நட்டு 
களை கழைந்து 
முற்றிய கதிர் நிலம்சாய 
அறுவடை செய்து 
புது நெல்லெடுத்து  
வீட்டு முற்றத்தில் 
மாவிலை தோரணம் கட்டி 
வர்ணஜால கோலம்மிட்டு
புத்தாடை உடுத்தி 
புதுப்பானையில் பொங்கலிட்டு 
பலவகை இனிப்புப் பண்டங்களுடன் 
கரும்பும் சேர்த்து 
கதிரவனுக்கு நன்றிகூற 
படையலிட்டு பார் எங்கும் 
கொண்டாடும் திருநாளாம் 
தமிழர் தைத்திருநாளாம் பொங்கலோ .....பொங்கல் 

                        நன்றி 
            மயிலை ச .சாந்தன்