மயிலிட்டிப் பகுதியில் மீள்குடியேமர்வுக்கு இடமளிக்க முடியாது. மயிலிட்டியைச் சேர்ந்தவர்கள் வளலாய்ப் பகுதியில் ஒதுக்கப்படும் காணிகளில் குடியேறலாம். தேவையானால் தமது கடற்றொழிலுக்கு மயிலிட்டித் துறைமுகத்தை அவர்கள் பயன்படுத்தலாம்.”

- இப்படி வடக்குப் படைகளின் கட்டளைத் தளபதி மேஜர் ஜெனரல் உதய பெரேரா தம்மை நேரில் அழைத்துத் தெரிவித்துவிட்டார் என வலி.வடக்கு இடம்பெயர்ந்தோர் சங்கத் தலைவர் அ.குணபாலசிங்கம் தெரிவித்தார்.

“வலி. வடக்கில் இடம்பெயர்ந்தோரை மீளக் குடியேற்றுவது தொடர்பில் அண்மைக் காலத்தில் படைத் தரப்புடன் நாங்கள் ஆறு சுற்றுப் பேச்சு நடத்தினோம். இடம்பெயர்ந்தோரின் புள்ளிவிவரங்களை எல்லாம் கஷ்டப்பட்டு சேகரித்து வழங்கினோம். ஆனால் பயன் ஏதும் கிட்டவில்லை.

மயிலிட்டிப் பகுதியைச் சேர்ந்தோரும் ஏனையோரும் வளலாய் காணிகளில் மீள்குடியேலாம் என்று நேற்று முன்தினம் என்னை அழைத்து யாழ். கட்டளைத் தளபதி நேரில் தெரிவித்தார்.

அப்படி வளலாயில் போய்க் குடியேற விரும்புபவர்களை குடியேற்றுங்கள் என்றேன். எனினும் கடற்றொழில் செய்பவர்கள் – மயிலிட்டியைச் சேர்ந்தவர்கள் – கடலுக்குப் பக்கத்தில்தான் குடியிருக்க வேண்டும். அப்படிக் குடியிருந்தால்தான் தொழில் செய்ய முடியும்.

வளலாயில் குடியிருந்து கொண்டு மயிலிட்டியில் போய் தொழில் செய்வது சாத்தியப்படாது என்பதை நேரடியாக அவருக்குத் தெரிவித்துவிட்டேன் – இவ்வாறு குணபாலசிங்கம் மேலும் தெரிவித்தார்.

நன்றி: ஈழதேசம்.கொம்

வலி.வடக்கு மக்களை நிரந்தரக் குடியிருப்பு அமைத்துக் குடியேற்ற இராணுவம் முயற்சி
வலி.வடக்கு மக்களை அவர்களின் சொந்த இடங்களில் மீளக்குடியமர அனுமதிக்காமல், நிரந்தரக் குடியிருப்பு அமைத்து குடியேற்றுவதற்கான யோசனைகளை நேற்று இடம்பெற்ற கலந்துரையாடலில் இராணுவத்தினர் முன்வைத்துள்ளனர்.
 
இருப்பினும் குறித்த யோசனையை எதிர்த்த மக்கள், காணிகளை சுவீகரிப்பதென்றால் எவ்வளவு காணிகளைச் சுவீகரிக்கப் போகின்றீர்கள் என்பதை அறிவியுங்கள். அதன் பின்னர் மீள்குடியமர்வு தொடர்பான கலந்துரையாடலுக்கு நாம் வருகின்றோம் என்று இராணுவத் தளபதியிடம் நேரடியாகத் தெரிவித்தனர்.
 
வலி.வடக்கு நலன்புரி நிலையத் தலைவர்கள், மீள்குடியேற்றக் குழுவினர் உள்ளடங்கலாக 35 பேர், வலி. வடக்கு மீள்குடியமர்வு தொடர்பில் யாழ்.மாவட்ட இராணுவத் தளபதி மேஜர் ஜெனரல் உதய பெரேராவுடன் நேற்றுக் கலந் துரையாடல் நடத்தினர்.