சாந்தைச் சந்தியிலிருந்து மயிலிட்டிச் சந்தி வரையான 1.5 கி.மீ நீளமான வீதி புனரமைப்பு.

16/9/2018

வலிகாமம் வடக்கில் படையினரின் ஆக்கிரமிப்பில் இருந்து கடந்த ஏப்ரல் மாதம் 13 ஆம் திகதி விடுவிக்கப்பட்ட சாந்தைச் சந்தியிலிருந்து மயிலிட்டி வடக்கு சந்தி வரையான சுமார் 1.5 கிலோமீற்றர் நீளமான வீதி மீள் குடியேற்ற அமைச்சின் நிதியுதவியுடன் வலி.வடக்கு பிர தேச சபையினால் தாரிட்டு புனரமைப்பு செய்யப்பட்டுள்ளது.

கடந்த நான்கு மாதங்களுக்குள் விடுவிக்கப்பட்ட இடங்களில் உள்ள வீதிகள் புனரமைப்பு இடம்பெற்றுள்ளது. இத்துரித செயற்பாட்டுக்காக அப்பகுதி பொது மக்கள் பிரதேச சபையினருக்கு நன்றி தெரிவித்தனர்;

இதேபோன்று கட்டுவன் மயிலிட்டி வீதியில் உள்ள வீரபத்திரர் கோயிலுக்கு அண்மையில் உள்ள உள்ளக வீதியான பைந்தாவைத்தை வீதி (810 மீற்றர்) வெள்ள வாய்க்கால் வீதியின் புனரமைப்பு பணிகள் அடுத்த வாரமளவில் கொங்கிறீட் வீதியாக புனரமைப்பு செய்யப்படவுள்ளது. இது வறுத்தலை பிள்ளையார் கோயில் வரையும் புனரமைக்கப்படவுள்ளது. கடந்த மாதமளவில் இவ்வீதி பற்றைகள் வெட்டி அகற்றும் பணிகள் இடம்பெற்றது.

இதேவேளை கட்டுவன் சந்தியிலிருந்து மயிலிட்டி வரையான வீதி அபிவிருத்தி அதிகாரசபைக்குச் சொந்தமான வீதியையும் மழை காலத்திற்கு முன்னராக புனரமைக்க சம்பந்தப்பட்டவர்கள் நடவடிக்கைகளை எடுக்க வேண்டும் எனவும் கோரப்பட்டுள்ளது.

இதேவேளை வீதி அபிவிருத்தி அதிகாரசபைக்குரிய சங்கானைச் சந்தி முதல் மல்லாகம் சந்தி வரையான வீதி மற்றும் மல்லாகம் சந்தி முதல் கட்டுவன் சந்தி, கட்டுவன் சந்தி மயிலிட்டிச் சந்தி வரையான பிரதான வீதிகள் காபெற் வீதிகளாக புனரமைக்கப்படவுள்ளன.

இதற்குரிய நடவடிக்கைகள் எடுக்கப்பட்டிருப்பதாக வீதி அபிவிருத்தி அதிகார சபை அதிகாரி ஒருவர் தெரிவித்தார்.